هل وضع بنتي مع جدتها طبيعي

خواتي أنا أنجبت بنتي بعد ست سنين من الحرمان واللهفه لطفل اضمه كنت طول هذي السنوات احلم كيف إربي أطفالي وإعطائهم من الحب والحنان والدلال مايكتفون فيه عن اي احد غيري لكن للأسف بنتي متعلقه بجدتها ام أبوها لدرجه انه في وجود الجده ما تعترف فيني ولاتطلب مني اي شي وماتجلس الا بحضن جدتها وإذا احد غيرها جلس تزعل وتبكي لين تأخذها جدتها اما أنا تشوفني أخذ الأطفال واحطهم بحضني ولايهمها حتى اذا طاحت او احد ضربها وبكت وشلتها تبكي لين تأخذها جدتها وأحيانا أكون لابسه عبايتي وبطلع وتشوفني وترفض تجئ معاي تبي تقعد عند جدتها وإذا روحنا بالسياره وجدتها معنا ماتجي عندي تجلس عند جدتها احس كأني شغاله لها هذا غير يوم نكون بعزيمه وطنشني وتروح لجدتها يبدن الحريم يضحكن ويعلقون مالك الا تعب الحمل والولادة وخلاص احملي بنتك متعلقه بجدتها وياحرام ماكأنك أمها والله قلبي يتقطع من الحزن مع أني والله مدللتها والعب معها ومااطلع اي مشوار الا اخذها معاي ما عمري تركتها عند جدتها الا اذا كنت طالعه لمستشفى وماتنام أبدا عند جدتها ولا اخليها تلبسها او تأكلها كل شي أنا اسويه لها لكن الله يرحم الحال
وجدتها مدللتها بشكل فضيع أنا اعتبره دلال تخريب تمشي فيها وتعطيها اي شي تبيه حتى لو كان خطا وإذا رفضت أعطيها شي او سمعتها تبكي فزعت لها على طول الان حاولت انها ماتنزل لجدتها يوميا وإذا نزلت ما اخليها تتعدا ساعتين بالكثير ومع هذا للان نفس الوضع مع انها عند خوالها وإذا طلعت لعزيمه وجدتها مو معانا ما فيه أحلا منها تكون هادية وتبيني وتفقدني اذا غبت وتبكي ادورني بس اذا شافت جدتها خلاص علي السلام
أنا الان بتوظف وأخاف تتعلق اكثر بجدتها وتبعد عني اكثر وغير كذا ابي إربيها صح ما ابي تتعود على الدلع الزائد وكل ماصاحت قالوا أبشري
والله تعبت وكرهت حتى اجتمع بمكان مع جدتها من الأحراج اللي يجيبني مع انها حتى أبوها اذا شأفته تبعد عنه تبي عمانها بس أبوها مبعد عنها وما يلعبها كثير عكس عمانها فما ألومها اما أنا كل شي سويته لها الا الخطأ طبعا مارضى هذا الفرق اللي بيني وبين جدتها وأبوها يقولي عادي انتي مكبرة الموضوع كل الأطفال كذا بس اللي أشوفه ان الأطفال يحبون جداتهم بس يبون أمهم حتى خالتي اذا بناتها جنها أشوف عيالهن ما يتعلقون بجدتهم زي بنتي مع انها تغير لهم وتنومهم وأحيانا يجلسون ايام نائمين عندها ومع هذا عادي وانا بنتي العكس وشلون اذا توظفت وصارت عند جدتها كل النهار أخاف طنشني نهائي
تكفون عطوني رايكم وتجاربكم مع العلم بنتي عمرها سنه ونص