السلام عليكم
حبيباتي عرايس عروس
شخباركم واخبار اطفالكم الغاليين
اليوم حابه اني افضفضلكم عن موضوع يخصني ومتعلق ببنتي الصغيرونه الله يحفظها
ومشكلتي مدري وين احطها بس قلت اكيد باحتاج اراء الامهات واهي اللي بتفيدني
عندي مشكلتين
1-احس ان بنتي مو متعلقه فيني كثير مثل بقية الاطفال اشوف بعض الاطفال ما يبون الا امهاتهم ولو احد شالهم يبكون
ولكن بنتي لا عادي كل من شالها عادي ما تبكي وتتقبل كل الناس وهذا الشئ يضايقني ابي احس اني امها وانها تعرفني وسبحان الله اليوم سوت هالحركه شالتها جارتي بكت حسيت بفرحه بس مو دايم تسوي هالشئ
والغريبه انها متعلقه في ابوها بصوره مو اعتياديه مع انه ما يشوفها كثير ودايم مشغوول
من تشوفه تبكي تبيه يشيلهاويلعبها انا استغربت بس لاحظت انها تحب مزح ابوها ويلاعبها بقوه كانها ولد
2- مشكلتي الكبيره جدااااااا (ام زوجي)
يا اخواتي انا ساكنه في بيت يتكون من طابقين
الطابق السفلي تسكنه ام زوجي وابوه وهم وحيدين مالهم احد غير زوجي لان كل بناتها و اولادها سافرو
والطابق الثاني انا وزوجي وهو طابق كامل ومنفصل عنهم تماما ومستقل يعني اعيش لحالي حتى مخرج بيتي منفصل عنهم
المشكله ام زوجي وحيده وبناتها سافرو وتقضي يومها بطوله في بيتها بوحده
وانا اعطف عليها اقول بس احس اني فاضيه بانزلها ازورها واشوفها وتفرح بشوفة بنتي
وبالذات لان بنتها كانت تعيش عندها وافتقدت ولد بنتها الصغير بعد سفرهم واحس انها تبي تعوض هالشئ في بنتي
المشكله اخاف بنتي تحبها اكثر مني وتتعلق فيها لان عندها اسلوب سحري سبحان الله مع الاطفال وتعرف تحببهم فيها لانها درست علم نفس واختصت بالاطفال وتعرف كيف تتعامل معهم
ولا اقدر اهرب منها لان البيت فوق البيت
وانا اعطف عليها لانها وحيده وتحس بفراغ واخاف بالاحتكاك افقد بنتي واصلا بنتي مو ناقصه تتعلق في كل الناس
وغير كدا انا مثل اي ام بالدنيا احب ان بنتي تعلق في اهلي اكثر من اهل ابوها ولكن بيت اهلي بعيد واخاف ما تحب اهلي واصبر نفسي واقول لا دايم الاطفال يحبون اهل امهم اكثر حتى لو ما شافوهم كثير
اخواتي مدري مشكلتي وين المفروض احطها قضايا وحلول او التربيه والطفل ولكن حسيت اني بحاجه لاستشارة الامهات لان استشارتكم اكيد بتنفعني
اتمنى تفيدوني شسوي وكيف اعلق بنتي في اكثر وهل احتكاكي بام زوجي معناه افقد بنتي
اخاف يجي يوم تروحلها وتجلس بحضنها ولا تجيني
ومشكورين عزيزاتي الامهات